Bárpmu čoahkkimasttii Tamperes – Nea Porsanger-Rintala máhcai sáhkadoallin

DIEĐÁHUS 24.3.2019: Bárpmu čoahkkimasttii Tamperes – Nea Porsanger-Rintala máhcai sáhkadoallin

Čoahkkimis ledje 12 lahtu Laikkus ja golbma Skype-oktavuođain. Govven: Máret Vuolab

Sis-Suoma Sámesearvi Bárbmu rs čoahkkanii jahkečoahkkimii Kulturviessu Laikkui Tamperei lávvardaga 23.3.2019. Čoahkkimis ledje fárus 12 lahtu čoahkkinlanjas ja vel golbma lahtu Skype-oktavuođain. Eanas oassi oasseváldiin ledje Tampere guovllus, muhto maid Jyväskyläs ledje boahtán lahtut čoahkkimii.

Čoahkkima áššelisttus ledje dábálaš jahkečoahkkináššit. Jahkečoahkkimis dohkkehuvvui jagi 2018 doaibmamuitalus ja ruhtadoallu ja stivrii mieđihuvvui vásttufriddjavuohta. Vássán jahkái čáhke ollu iešguđetlágan doaimmat, ja jagi 2018 loahpas searvvis ledje badjel 100 lahtu.

Jyväskylä jahkečoahkkimis searvvi sáhkadoallin válljejuvvui ovttamielalaččat Biret Jon Niillas-Ándde Veikko Nea. Jyväskyläs ássi Nea Porsanger-Rintala lea okta searvvi vuođđudeaddjiin ja leamašan searvvi sáhkadoallin vuođđudančoahkkimis gitta njukčamánnui 2017, man maŋŋá son doaimmai guokte jagi stivrra várrelahttun. Mannan jagi sáhkadoalli Bikko-Hánno Hánssa Hilkka Maritta, Maritta Stoor-Lehtonen Jyväskyläs joatká stivrras várresáhkadoallin. Stivrii válljejedje maid searvvi čálli Hánssa Ristena Antero Máreha, Maarit Vuolab Nokias ja várrelahttun searvvi ruhtadoalli Maarit Haltta Tamperes ja Virpi Kulmala Tamperes.

Ruhtadoalli Maarit Haltta, čálli Máret Vuolab, sáhkadoalli Nea Porsanger-Rintala ja várresáhkadoalli Maritta Stoor-Lehtonen čoahkkima maŋŋá Laikkus. Stivrra várrelahttu Virpi Kulmala válddii oasi čoahkkimii Skype-oktavuođain. Govven Jan Saijets.

Doaibmaplánii čállojuvvui, ahte doaibmajagi erenoamáš temán lea sámegielaid máŋggabealatvuohta. Erenoamáš temáin Bárbmu váldá oasi ON:a riikkaidgaskasaš álgoálbmotgielaid jahkái. Ulbmilin lea lasihit gielladiđolašvuođa nu searvvi lahtuid gaskkas go maid searvvi doaibmanguovllus. Jagi 2019 ulbmilin lea earret eará ordnet sámegielat giellariekkisdeaivvadeamiid dahje giellariššodoaimmaid ja ávžžuhit geavahit sámegielaid searvvi sierra deaivvadeamiin.

Sámedikki kulturlávdegoddi mieđihii Bárbmui searvvi doaibmadoarjaga lassin prošeaktadoarjagiid kursadoibmii, bearašdoibmii ja Sugrifest-dáhpáhussii, mii lágiduvvo Tamperes golggotmánus. Duodjekurssat leat leamašan okta searvvi bivnnuheamos doaimmain mannan jagiid, man dihte maid dán jagi lea ulbmilin ordnet duodjeleairra muhtun vahkkoloahpa. Vejolašvuođaid mielde joatkit maid Duodji Café -doaimma. Ulbmilin lea ordnet bearašleairra Sámis muhtun dáhpáhusa oktavuođas, vai sámeguovllu olggobealde ássi sámit besset maiddái oassálastit sámekulturdáhpáhusaide, mii seammás nanne lahtuid identitehta. Jyväskylä gávpogis searvi fidnii doaibmadoarjaga máŋggakultuvrralaš doaimmaide.

Sis-Suoma Sámesearvi Bárbmu rs deavdá čakčat 2019 čieža jagi. Bárbmu lea Suoma sámeservviid joavkkus ain hui nuorra searvi, muhto lea jo stáđásmahttán iežas saji Sis-Suoma sámiid deaivvadanbáikin. Jagi 2019 joatkit kártema makkár doaimmaid lahtut sávvet ja mo buoridit diđolašvuođa searvvis earenoamážit Sis-Suoma sámiid gaskkas.

Lassedieđut:
Sis-Suoma Sámesearvi Bárbmu rs ry.barbmu.rs@gmail.com
Sáhkadoalli Nea Porsanger-Rintala 050 597 0991
Várresáhkadoalli Maritta Stoor-Lehtonen 0400 530 087

Mainokset

Buorit juovllat! Pyereh juovlah! Šiõǥǥ Rosttvid! Hyvää joulua!

IMG_3206

 

Ilolaš juovlaáigge ja menestumi ođđa jahkái 2019!
Ilolâš juovlâiääigi já miänástume uđđâ ihán 2019!
Rämmsallaž Rosttovpõõ ́zzid da Lekkvuõđ Ođđ Ekka 2019!
Iloista joulunaikaa ja menestystä uudelle vuodelle 2019!

Ráfálaš juovlaáigge sávvamiin,
Tubdâmušlâš juovlâiääigi tuáivutmáin,
Rääuhsallaž Rosttovpõõ ́zzid äjstee ́l,
Tunnelmallista joulunaikaa toivottaen,

stivra / hallitus
Sisä-Suomen saamelaisyhdistys Bárbmu ry, Bárbmu rs

Bárbmu čoahkkimasttii Jyväskyläs – sáhkadoallin Maritta Stoor-Lehtonen

Dieđáhus 27.3.2018 (suomeksi)

Bárbmu čoahkkimasttii Jyväskyläs – sáhkadoallin Maritta Stoor-Lehtonen

Sis-Suoma Sámesearvi Bárbmu rs čoahkkanii mannan lávvardaga Jyväskyläi doallat jahkečoahkkima. Deaivvadeamis ledje fárus oktiibuot 17 lahtu nu Jyväskyläs, Tamperes go Turkusge. Ieš čoahkkimii lei vejolaš váldit oasi maid gáiddusoktavuođain.

Jahkečoahkkima áššelisttus ledje dábálaš jahkečoahkkináššit. Jahkečoahkkimis dohkkehuvvui jagi 2017 doaibmamuitalus ja ruhtadoallu ja stivrii mieđihuvvui vásttufriddjavuohta. Vássán jahkái čáhke iešguđetlágan doaimmat, ja jagi 2017 loahpas searvvis ledje badjel 90 lahtu.

Nea Porsanger-Rintala, Virpi Kulmala, Maritta Stoor-Lehtonen ja Heidi Hjorth Jyväskyläs jahkečoahkkima maŋŋá. Stivralahtuin govas váilu Maarit Haltta. Govvejeaddji Jarmo Pautamo.

Jyväskylä jahkečoahkkimis searvvi sáhkadoallin válljejuvvui ovttamielalaččat Bikko-Hánno Hánssa Hilkka Maritta. Jyväskyläs ássi Maritta Stoor-Lehtonen lea okta searvvi vuođđudeaddjiin ja leamašan aktiivvalaččat fárus searvvi doaimmain dan álggu rájes. Stoor-Lehtonen maid ovddasta searvvi Pirkanmaa ja Gaska-Suoma etnihkalaš gaskavuođaid ráđđádallangoddi ETNOs.

Stivrii ožžo maid ođđa olbmuid go stivrralahttun álggaheigga Maarit Haltta Tamperes ja Heidi Hjorth Turkus. Várrelahttun joatkiba Virpi Kulmala Tamperes ja Nea Porsanger-Rintala Jyväskyläs.

Doaibmaplánii čállojuvvui, ahte guđát doaibmanjagi erenoamáš temán lea searvvušlašvuohta. Searvi háliida doarjut doaibmanguovllu sámiid deaivvadit ja oahpásmuvvat guhtet guimmiidasaset. Sámiservoša nannen doarju ja nanne maid lahtuid identitehta, mii lea leamašan searvvi doaimma ulbmil vuođđudeami rájes.

Jagi 2018 áigge searvi joatká earálágán deaivvademiid ordnema. Ulbmilin lea maid ordnet duodje- dahje eará árbediehtokurssaid ja bearašleairra. Vaikko searvvi virggálaš ruovttubáiki leage Jyväskylä, searvi lea doaibman aktiivvalaččat erenomážit Gaska-Suomas ja Pirkanmaas. Dán jagi stivrras álggahii lahttu maid Turkus, nu ahte vejolašvuođaid mielde searvi bargagoahtá maid doppe.

Lassedieđut:
Sáhkadoalli Maritta Stoor-Lehtonen 0400 530 087